يورا بيلمز يوللار مني

۱۳۸٢/۱٢/۳
خودونون توته ئی
اين داستان (نبلبک خداويردی) مربوط به زمانی است که راهزنان بر منطقه اردبيل تسلط داشتند واين نشادهنده اينست که در اين منطقه از آذربايجان که محروم بوده امنيتی نيز وجود نداشته است.نويسنده اين داستان آقای ممی زاده معروف به آغداشلی می باشد.وی اغلب در هفته نامه های چاپ اردبيل وفصلنامه آذری و.... مطلب می نويسد ورمان شامان در دو جلد اثر وی است.همچنين طنز معروف موزآلان در هفته نامه آراز نوشته او است.



حكايه
خودونون توتةيي
ع. م. آغداشلي
گونش چيخار ـ چيخماز اولاغي تؤيلةدن چيخارتدي. آروادلا ياغي، پئنديري و يومورتاني چاتا ـ چاتا شهردن نه آلاجاغيني بير داها يادداشينين سياهيسيندا قيد ائتدي: چاي، قند، كيشميش، بير آز دا اوشاقلارا آيين ـ اويون. آرواد خصوصيله تاپشيرميشدي كي، قند ياديندان چيخماسين. چونكي، كؤرپه آديگؤزةلين قارني اينك سودونو گؤتورموردو. سلمي خالا دئنميشدي كي، گون آشيرا قندداغ وئرسةنيز اوشاق دوزةلر.
آتاسينين صاباح شهره گئدةجةييندن هاميدان چوخ خودو سئوينيردي. بؤيوك بير اركياناليق و يالواريش ايفادةسيله آتاسيندان ايستةميشدي كي، اونا توتك آلسين. آخي آرتيق بؤيوموشدو و بو ايل قويونلاريني اؤزو اوتاراجاقدي. او، دفعةلرله اؤزوندن سوروشموشدو كي، توتكسيز قويون اوتارماق اولارمي؟ سونرا اؤز سؤالينا اؤزو جاواب وئرميشدي: البته اولماز! چاي قيراغيندا اوتوروب بللةسينين بير تيكةسيني اؤزو يئييب بير تيكةسيني ده قاباغيندا شؤنگويوب گؤزلريني اونا ديكن داغباسانا آتا ـ آتا اؤز ـ اؤزونه دوشونموشدو كي، آللاه ائلةمةميشكن جاناوار گلسه داغباساندان چوخ توتكدن قورخوب قويونلارا سوخولماياجاق. حتي بو گئجه ياتاقدا گؤزلريني يومانا كيمي «توتك ياديندان چيخماسين» دئيه آتاسينا تاپشيرميشدي. دونن آخشامچاغي آناسينا خبردارليق دا وئرميشدي:
ـ من نئينيم، توتك آلماساز، قويونلاري جاناوار يئسه تاقصير اؤز بوينوزادير.
دئمك آتاسي شهردن توتكسيز قاييتسايدي، عؤمرونون سونونا كيمي باغيشلانماياجاقدي.
آرواد ايكي آناجين قيچلاريني باغلاييب اولاغين اوستونه قويدو و «گئت، آللاها تاپشيرديم» ـ دئييب كيشيني يولا سالماق ايستةينده «دورنا» خالا الينده بير فئره حيةت قاپيسيندان ايچةري گيردي:
ـ باشووا دؤنوم، آي حةتم قاغا، بونو وئررسن بير آز اييده، بير آز دا چاينان كيشميش آلارسان. كيشينين چايخورلوغو بيزي ديرريكدن ساليب.
ماهي قيميشا ـ قيميشا دورنايا ساتاشدي:
ـ ياخشي ائلةييب دئميرسن، او قدر گؤزو گؤتورمةين وار كي.
ـ آي باجي، نةيين دئيةجةيم، قيزين دا دئمةيي وار؟
ـ ويي، باشيما خئيير، نه اولسون كي، آللاها آجيق گلر. بو دؤنه قيزي اولوب، گلن دؤنه ده آللاه اوغول وئرر.
دورناينان ماهي نين دانيشيغي هله بو تئزليكده قورتاراسي دئييلدي. حةتم فئرةني اونون اليندن آليب اولاغين اوستونه قويدو و قاپيدان چيخدي.
«بةدل» يولو تاماميله امين ـ آمانسيزليق ايدي. او گونلر هر بير كولون ديبينده نئچه اوغرو پوسوردو. بير هفته بوندان قاباق يازيق «بهري»نين نةيي وارديسا، اليندن آليب يولا سالميشديلار. ظاليملار اگنينين پالتارينا دا قييميشديلار. سلمي خالا «يئنه آدامين اؤزونو اؤلدورمورلر، چوخدو» دئميشدي.
نه ايسه، حةتم اولاغين آغزيني «يئكةلي»يه طرف يؤنلتدي. «گيلاندو»وو كئچيب پوچت يولونا يئتيشنده آرخايينلاشدي. كؤكسونو اؤتوروب آلاجاغي شئيلري بير داها بئينينه حك ائتدي. خودونون توتةيي هاميسيندان اولده ايدي. «تةكي درد بير دنه توتك دردي اولسون، اونا ـ بونا يالوارماقدان اوزومون سويو تؤكولوب…» دئيه اؤز ـ اؤزونه دوشوندو و «آخير كي، يونجا بيتدي، اؤكوزوم اؤلمةدي» ايفادةسيني آز قالا اوجا سسله دئمك ايستةييردي.
حةتم خوش بير احوال روحيه ايله گيلاندو كؤرپوسونو كئچيب «سالتاوار» تورشونا يئتيشدي. هله ده اؤز عالميني سئير ائديردي: «خودو بالام صاباح قويون اوتارماغا گئدةجك. ائه، بير دلي شيطان دئيير ياريم چةرك «آغايي» آل آخشاما سودلو پلو بيشيرك، جهنمه كي…»
بيردن، «كيشي كارسان؟ ساخلا گؤروم»، سسي اونو سئير ائتديگي دونيادان آييردي. قاباغيني ايكي نفر الي بئرنولو شايسةون كسميشدي. آمما وضعيتين نه يئرده اولدوغونو بيلميردي. «اشكارليق» دؤرو اولدوغو هله ده يادينا دوشموردو. اودور كي، اؤزونو ايتيرمةدن اولاغي ساخلاييب دئدي:
ـ نه دئييرسيز بالا؟
ـ هارا گئديرسن؟
ـ گؤرمورسوز، شهره گئديرم دةةة. ائوه آيين ـ اويون آلماغا.
ـ هانسي كندليسن؟
ـ «يئيجة»لي.
شايسةونلر حةتمي اله سالماغا باشلاديلار:
«يئيجةلي، قودوغو اؤلر دينجةلي»
هله ده هئچ زاد سئزمةين حةتم ديللندي:
ـ باشووا دؤنوم، دةدن يئريندةيم، نيه اله ساليرسيز؟
شايسةوةنين بيري حةتمي ياخالادي:
ـ كس سسيني، ايت اوغلو ايت. گؤر اؤزون نه ده تولكولويه ووروب…
او بيري شايسةون آجيقلي بير ايفاده ايله دئدي:
ـ اويونون اؤيرةنمةميش داغالليغين اؤيرةنير ولدالزنالار. بس بةدل يولوينان نيه گئتميرسن؟
حةتم «باشووا دؤنوم، آخي بةدل يولو اوغرو ـ موغروينان دولودور. اوردان گئتمك اولار؟»، دئمك ايستةينده بيردن هر شئيي باشا دوشدو. اول بئينيه ووردو كي، بةهرينين ده آجيغيني بونلاردان چيخسين. آمما ايكيسينه گوجو چاتماياجاغيني، اولاغي يوكو ايله ايتيرةجةييني و خودونون توتكسيز قالاجاغيني خاطيرلاييب آجيغيني چتينليكله اوددو. اؤزونو اله آليب دئدي:
ـ باشوزا دؤنوم منه گؤره قوللوغونوز؟
ـ يوكون نةدي؟
ـ ياغ، پئندير.
شايسةوةنين بيري اولاغين اوستوندةكي يوكو آراديقدان سونرا يولداشينا دؤندو:
ـ دوز دئيير. آمما يئمةلي تويوغو دا وار آآآ.
حةتمين اورةيي بير آز يئرينه گلدي. اؤز ـ اؤزونه «ايت آپاران اولسون، بير آز ياغدان، پئنديردن وئريب سووشارام دئدي و دؤرد ـ بئش لاواشين آراسينا بير چالخام ياغ، بير ايكي ديليم پئندير قويوب دئدي:
ـ آلين يئيرسيز، حالاليز اولسون، اؤز راضيليغيمنان وئريرم.
شايسةونلر گولوشدولر:
ـ آللاه كؤمةيين اولسون، ياخشي كي، حالال ائديرسن، يوخسا بوغازيميزدان گئتمز.
هر شئي اؤز قايداسيندا گئديردي. بير قولدورا چاپيلان آدام او گون مقصده كيمي امين ـ آمانليقدا اولمالي ايدي. چونكي آيري بير قولدورون اونا ساتاشماسي اولكي قولدورو تحقير ائلةمك دئمك ايدي.
قولدورلارين بيري آلديغي باغ ـ پئنديري يئكه بير دستمالا باغلادي. او بيريسينين گؤزو سبدين ايچينده سامان آراسيندا سليقه ايله يئرلشديريلميش يومورتالارا دوشدو. فيكريندن نه ايسه كئچدي و يولداشينا دؤندو:
ـ يومورتالاردان ياخشي نيشانا اولار آآآ.
ـ دوز دئييرسن كئچل.
اونلار يومورتالاري سبددن چيخاريب اللي مئترليكده سيرا دوزدولر. بيري او باشدان، بيري ايسه بو باشدان وورماغا باشلاديلار. بئرنو گوللةلري يومورتالارين هاميسيني تورپاق كيمي سوووردو.
حةتمين گؤزلريندن ياش سوزولوردوسه ده ياغ ـ پئنديرين قالاني ايله تويوقلاري ساتيب بير آز آيين اويون و البته خودويا توتك آلا بيلةجةيينه گووةنيردي. بلكه ده اولاغي سوروب يولونو داوام ائتديرسةيدي، قولدورلارين ايشي اولماياجاقدي. آمما حةتم دايانيب اونلارين اجازةسيني گوددو.
قولدورلار يئنه اولاغا ساري گلديلر. بيري او بيريسينه دئدي:
ـ ايه كئچل، گلسنه تويوقلاردان بيريني گؤتوروب ديشيميزي دةييشك؟
ـ بس نةةة.
حةتم اؤزو آناجين بيريني آچيب وئرمك ايستةدي. آمما آرتيق ايش ـ ايشدن كئچميشدي. شايسةون فئرةني گؤتورموشدو. حةتم اونا ياخينلاشيب فئرةني آلدي و دئدي:
ـ باشووا دؤنوم، بو آماناتدي، آناجلاردان بيريني گؤتور.
اونون بو داورانيشي شايسةونه آغير گلدي:
- آده، قانجيغين بالاسي قانجيق، اوتانميرسان؟ فئرةني اليمدن آليرسان؟
ـ قادان اورةييمه، آخي بو آماناتدي. وئره بيلمةرم. آناجلارين لاپ ايكيسين ده گؤتور، سنين اولسون.
ـ ويي، كيشيده اوزه باخ سن آللاه. بس منيم دؤيو سنيندي؟
حةتمين ديشي بوغارساغين كسيردي. آماناتا خيانت ائتمةيي غيرتينه سيغيشديرا بيلمزدي. سون سؤزونو دئمةلي ايدي:
ـ اؤلدورسن ده فئرةني وئرمةرم!
قولدور بئرنووو قاريشديردي و حةتمي نشان آلدي:
ـ آت يئره فئرةني، اؤزون ده گل آياغيمنان اؤپ. يوخسا گوناهيندان كئچمةرم.
ـ من آماناتا خيانت ائده بيلمةرم.
او بيريسي قولدور ديللندي:
ـ ايه كئچل، بير گوللة چاخ بئينينه، گؤرةك آخماق آداملار نه جور جان وئرير.
قولدورون بارماغي قورخولوغون ايچينه، تةتيه ايليشدي و…
حةتم قيوريليب ييخيلدي. سودان چيخاريلان باليق كيمي چابالاماغا باشلادي. هله ده فئرةنين آياقلاريني اووجونون ايچينده برك ـ برك سيخميشدي. قولدور فئرةني اونون اليندن چيخارماق ايستةدي، لاكين ممكن اولمادي. يولداشينا دؤندو:
ـ ايه كئچل، او سن اؤلةسن بو تاتلاردا لاپ ايت جاني وار.
گوللة قارنيندان دةييب كورةيينين اورتاسيندان چيخميشدي. بئينينده، كئچيرديگي بوتون گونلر جانلانماغا باشلادي. تاي ـ توشلاري، آتا ـ آناسي، حتي ماهي ايله ائولنمةسي و اوشاقلارينين، خودونون اولماسي بئله بعضا سيرا ايله بعضا ده قاريشيق شكيلده گؤزونون اؤنوندن سووشوردو. قان گئتديكجه بئينينده تجسم ائتديرديگي آداملار و اشيالار ياواش ـ ياواش كوبود فيقورلارا دؤنوردو. سون گوجونو توپلاييب گؤزلريني ياز سماسينا ديكدي و فئرةنين آياغيني مؤحكم توتموش بارماقلاري آچيلدي.
شايسةون اگيليب فئرةني گؤتورنده گؤزلري حةتمين گؤزلرينه ساتاشدي. آرتيق دونيادا هئچ نةيي گؤرمةين او گؤزلرين درينليگينده حك اولونموش سونسوز نيفرت قولدورو سارسيتدي. انساني تويوق قدر سايا سالمايان شايسةوةنين بدنينه اسمةجه دوشدو. يولداشي اونون وضعيتيني گؤروب، «ايه، سنده سرچه اورةيي ده يوخموش كي» دئييب مييتي آغزي اوسته دؤندردي…
قويونلار نةدنسه اوركدو و قيچلاريني يارغاندان ساللاييب اوتوران اون اوچ ياشلي خودو او گوندن دوز آلتي ايل اوزاقلاشدي…
باليقلي كوكرةييردي. ياز هاواسيندان سرخوش اولموش بير سيچان يوواسينين قاباغيندا ائشةنك آتيردي. ساوالانين اتةييندةكي قار هله ده يازا تسليم اولماق ايستةميردي. كؤرپه قوزو سون درجه ائهتراصلا آناسيني اميردي و خودونون «امام قوشو» دئيه سون درجه سئوديگي توراغايلار اوخوشا ـ اوخوشا يازين ماوي سماسينا هوپوردولار…





دومان

[ خانه | آرشيو | پست الكترونيك ]