يورا بيلمز يوللار مني

۱۳۸٢/۱۱/٩
تاريخ اردبيل وداستان کوتاه قارا بايرام از آغداشلی
اردبيل يک شهر کهن وتاريخی است و وجود آنرا پيش از زمان زرتشت ميدانند.ميگويند لفظ اردبيل در اصل آرتا ويل بودکه از کلمه آرتا يعنی مقدس و ويل يعنی شهر تشکيل شده است.

آرت ويل باستانی کنزق ديرين بود اردبيل وگنزه حالای آذربايجان

معنی آرتا مقدس معنی ويل است شهر درزبان کهنه شيوای آذربايجان

چون مقدس بود اين شهر از زمان زردشت آن گرامی بخرد دانای آذربايجان

آرت ويل و گنزق پيشين زمانی بوده ا ند پایتخت قسمت بالای آذربایجان

امروزه اهالی ار دبيل اسم آرتا را بعنوان يکی از اسامی دختر استفاده مي کنند.

همچنين آمده است که: ارد ويل از دو کلمه ارد و ويل تشکيل شده است که ارد نام روز بيست وپنجم از هر ماه و نيز نام يکی از فرشتگان زردشتی است و بمعنی قانونی ومقدس و مثشرع است چنانچه در کلمات ارديبهشت؛اردشير؛ادويراف آمده است و ويل که هنوز در زبانهای اروپائی استفاده می شود بمعنی شهر است:لذا اردبيل با تحريف از ارويل بمعنی شهر مقدس حواهد بود.
در شهر اردبيل از اسم آرتا بعنوان اسامی پارک شرکت و... استفاده شده و اين نشادهنده علاقه مردم اين شهر به اسم آرتا ميباشد.




اين داستان کوتاه از استاد آغداشلی به زبان ترکی به خوانندگان آذربايجانی وبلاگ تقديم می شود


ع. م. ‎آغداشلي

قارا بايرام
( آنامين وفاتينين بيرينجي ايلدؤنومو موناسيبتيله)
اورةييندن هر شئي كئچيردي. بلكه بير گون آنام اؤلدو؟ چتين آنلاردا آنا سيغيناجاغي تاپا بيلمةين اوشاقلارين سارسيلديغينين دفعةلرله شاهيدي اولموشدو. خصوصيله بايرام گونلرينده ((يازيقلارين قارا بايراميدير)) سؤزونو چوخ ائشيتميشدي. جمعي بئش ياشي اولدوغونا باخماياراق نئچه ـ نئچه آنانين قارا تورپاق آلتينا گئتديگيني گؤرموشدو. عاديجه سويوق دگمةدن ستةلجم اولانين، سيلل توتانين ….ياخود اوشاق اوسته اؤلن آنالارين سايي ان آزي ايگيرمي نفره چاتيردي. ياخشي ياديندادير. پاييزين اوزون گئجةلرينين بيرينده دان يئري سؤكولر ـ سؤكولمز بير يوخو گؤردو:
«پاكيزه خالا كيچيك پئنجةرةلرينين شيشةسيني تاققيلداداراق آناسيني سسلةييب دئدي: رحيمه اوشاق اوسته اؤلوب، آروادلارين هاميسي گئدير، سن ده گليرسنسه تئز اول». واييش «اوشاق اوسته اؤلوب» سؤزونو ائشيتمك هةمن يوخودان ديك آتيليب آغلاماغا باشلادي. آناسي اونو باغرينا باسيب گؤزونون ياشيني سيلدي. آناسينين ديري اولدوغونا هله ده اينانمايان واييش اليني اونون اوز ـ گؤزونده، بويون ـ بوغازيندا و دؤشونده گزديرةرك ديري اولدوغوندان آرخايين اولوب آز قالا اريييب جانينا هوپاجاق قدر آناسينا سيغيندي.
بئش ـ اون گون اوندان سونرا تؤحيدين رحمتليك رحيمةنين اوغلو ايبيشه «ننه ياماني» دئديگيني آناسينا دانيشاندا آناسي اونا تاپشيراراق:
«نابا، نابا ائله سؤزلر آغزيندان چيخا. آناسيز اوشاغين قلبي سينيق اولار، سودومو سنه حالال ائلةمةرم»، دئميشدي.
واييش يئرينه گيريب آناسينين ايستي قوينوندا ياتاندا هله يوخو آپارماميش موختليف فيكيرلرله ال به ياخا اولوردو: «بلكه منيم ده آنام بيزي دوغاندا … يوخ، ديليم قوروسون … ائه، كاش آنام اصلا مني دوغمايايدي… اوندا بس آنامين بالاسي كيم اولاردي، هه؟ … آللاها شوكور كي، آناما هئچ زاد اولماييب. آللاه ائلةمةسين بير ده دوغا …»
آناسي ايسه قوينونداكي واييشين قلبينين چيرپينتيسيندان اونون هيةجان كئچيرديگيني دويور و پامبيقدان دا يومشاق اولان اليله اوشاغين بويون ـ بوغازيني سيغاللايير، اليني كورةيينه چةكير و اوزونو اوزونه سؤيكةيةرك اونا سونسوز ذؤق آشيلاييردي.
او ايل يئددي ياشينا چاتميش واييشي دا آتاسي اؤزو ايله شهره آپاراجاقدي. آخي اوشاقلار او ياشا چاتديقدان سونرا ايلده بير دفعه، نوروز بايرامينا اوچ ـ دؤرد گون قالاندا آتالاري، عميلري، ياخود دا بؤيوك قارداشلاري ايله شهره گئديرديلر. اؤزوندن بؤيوك قارداشي كئچن ايل شهره گئتميشدي و شهرين نه اولدوغونو بيليردي. واييشا شهردن آغيز دولوسو دانيشميشدي. حتي ناغيللاردا دئييلديگيني ده اؤز گؤردوكلرينه قاتيب دئمكله واييشدا شهره نسبت باشقا بير احوال روحيه ياراتميشدي. حامامدان خوشو گلمةسه ده پيسلةمةميشدي. پيسلةسةيدي ده واييش اينانماياجاقدي. آخي سودان كيمين آجيغي گلةر؟
بايراما دوز اون يئددي گون قالميش وعده يئلي اسةن گوندن اعتبارا گونلري سايماغا باشلادي. آتاسينين دئديگينه گؤره آخير چةرشنبةيه ايكي گون قالاندا شهره گئدةجكديلر. بو ايلكي بايرام شنبةيه دوشوردو.
نهايت سود گونو گليب چاتدي و واييش بو گئجةني زورلا دا اولسا سحره چيخارتدي. آناسي خوروزون ايلك بانيندا اورةيينين باشيندان توتان خفيف بير سانجيدان يوخودان آييلدي. اول واييشا باش چكدي. اوشاغين دوداغي خفيفجه قاچير و شيرين يوخو، بلكه ده شهر يوخوسو گؤروردو. يورغاني اوشاغين اوستونده بركيديب حيةطه چيخدي. سانجي خفيف ده اولسا، آزالميردي. آيگونو اولدوغونو يقين ائديب فيكره گئتدي. كيشيني اوياديب ماجراني دئمك ايستةدي. بيردن واييشين شهره گئتمك هوةسي يادينا دوشدو. اوشاغا قييمادي. اورةيينين باشيني بير آز اووشدوروب ياتاغا اوزاندي. نهايت دان يئري سؤكولنده كيشيني اوياتدي. هر ايكيسي دستماز آليب ناماز قيلديلار. ناماز قورتارار ـ قورتارماز واييش ديك آتيلدي، لاكين آتاسينين ائودن چيخماديغيني گؤروب اؤزونو ياتميشليغا ووردو. آناسي نامازدان سونرا ياغدان، پئنديردن، يومورتادان و ساتيلاسي نه وار ايديسه ايكي وئديرةده يئرلشديردي. بايرام آيين ـ اويونونا لازيم اولان توربالاري دا خورجونون گؤزونه قويدو. واييشين اوياق اولدوغونو بيلمةين آنا اونون باشينين اوستونه گلدي. واييش اؤزونو هله ده ياتميشليغا وورموشدو. او، هيمشةكي كيمي هم آناسينين اللرينين حرارتيني بويون ـ بوغازيندا دويماق، هم ده سيناماق ايستةييردي. يعني كي، گؤرسون اونو شهره آپاريرلار، يوخسا ايلدةكي كيمي باشيني آلداتماق ايستةييرلر. اونون بو تدبيري آناسينين گؤزوندن يايينمادي و هاچاندان هاچانا گؤزلريني آچاندا اوزوندن اؤپوب دئدي:
ـ خبيث، اوياقميشسان كي؟
ـ هه، ائله بيليرسيز ددةم منسيز شهره گئده بيلر؟
آناسي اونون بويونو اوخشادي:
ـ ماشاللا سن اؤزون كيشيسن دةةة.
ـ به نةةة. شهردن سنه يايليق آلاجاغام دا!
آرواد « بالامين كيشي بويونا آناسي قوربان»ـ دئيه واييشي يئريندن قالديردي. ال ـ اوزونو يودو، پالتاريني گئيينديردي و ارينه دؤندو:
ـ اوشاغين اؤز اگنينه پئنجك ـ شالوار آلارسان…
اورةيينين باشيندان بو دفعه داها گوجلو توتان سانجيني گيزلي ساخلايا بيلمةدي. واييش آتاسيندان قاباق ديللندي:
ـ سنه نه اولدو آنا؟
آرواد كيشينين ده سؤال دولو باخيشلارينا جاواب اولاراق كسگسن ايفاده ايله دئدي:
ـ منه هئچ نه اولماييب.
سونرا كيشيه آيگونو اولدوغونو بيلديرةرك آرتيردي:
ـ سيز يوبانمايين، بؤيوشو يوللارام زولئيخا باجيني چاغيرار، سيزليك بير ايش يوخدور.
دوغرودان دا اونلارليق هئچ بير ايش يوخ ايدي. مال ـ حيوانا باخماقدان باشقا بوتون ايشلري آروادلار گؤرةجكدي و كيشينين شهره گئتمةسي داها دا اووسانايا دوشوردو. چونكي لازيم اولان دارچين، زنجةفيل، ساري كؤك و سايرةني آليب گتيرةجكدي…
اونلار بئش ـ اون نفرله بيرليكده يولا دوشوب يئكةليني و گيلاندوو كئچديلر وگونش چيخار ـ چيخماز پوچت يولونا يئتيشديلر. واييشين بيرينجي دفعه شهره گئتديگيني بيلن گول آغا اونا ظارافاتلا ياناشدي:
ـ بيليرسن دةةة، شهره بيرينجي دفعه گئدن آدام آغزينا سوموك گؤتورمةليدير. يوخسا دوشر ـ دومةزي اولار!
واييش دوشر ـ دومةزين معناسيني بيلميردي. گول آغا ايضاح ائدةرك دئدي:
ـ يعني كي، بير داها شهره گله بيلمز سن!
بو، واييش اوچون هر نةدن چتين ايدي. «نه وار كي، آغزيما سوموك ده گؤتورةرم» ـ دئيه اؤز ـ اؤزونه دوشوندو، لاكين سومويو هارادان تاپاجاق و هاچان آغزينا آلاجاق سؤاللاري جاوابسيز ايدي. آتاسيندان سوروشماغا دا اوزو گلميردي. هردن سؤال دولو باخيشلارلا گول آغايا باخيردي. گول آغا ايسه اؤزونو او يانا قويموردو.
نمين ماشيني يول اوستونده ماشين گؤزلةين آداملاري گؤروب ساخلادي. واييش آتاسي ايله گوجنن ماشينا سوخولدو. ماشين ياريم ساعاتدان سونرا گيلان قاراجيندا داياندي و سرنشينلر ائنيب هةرةسي بير طرفه يوللانديلار. گول آغا اونلاردان آيريلاركن پيچيلتيا اوخشار سسله واييشا دئدي:
ـ ناراحات اولما، من هاميا دئيةرم كي، واييش آغزينا سوموك گؤتورموشدو.
واييش دريندن نفس آليب آرخايينلاشدي و گؤزلريندن ساچان اوشاق گولوشو ايله ممنون اولدوغونو بيلديردي.
هرشئيدن اول ياغي، پئنديري و يومورتالاري موشتري اولدوقلاري باققالا وئريب «ناغي» حامامينا گئتديلر. اون دؤرد ياشيندان بؤيوك يئني يئتمةلره، گنجلةره و كيشيلةره فيته و قةتوه وئريليردي. سويونوب ايچةري كئچديلر. بوخار آدامي بوغوردو. داها چوخ صابين كؤپويونه اوخشايان چيركاب قانووچالاردان آخيردي. سسلر گونبذده عكس صدا تؤرةدير و كيمين كيمه نه دئديگيني آوارماق اولموردو. آتاسي واييشا خبردارليق ائدةرك «گؤزله سوروشوب ييخيلماياسان» دئدي و اؤزو خزينةيه گيرديكدن سونرا اونو دا قالديريب آز قالا يانديراجاق ايستي سويا سالدي. واييش ايچيني چكدي و قيشغيرماسينين قارشيسيني گوجله آلدي…
حامامدان چيخديقدان سونرا ياغ ـ پئنديري وئرديكلري باققالا مراجعت ائلةديلر. باققال «حسابلاماغا واختيم يوخدور» ـ دئيه بئش ـ اون تومن پول وئريب آرتيردي:
ـ گينه لازيمسا پول وئريم؟ گئدين، آلاجاغينيزي آلين، گون اورتا چاغي حسابلاشاريق.
واييش گيلين ايكينجي ايشي پئنجك ـ شالوار آلماق ايدي. «تزه ميدان»ا گئتديلر. آتاسي ساتيجيا مراجعت ائدةرك دئدي:
ـ اوشاغين اگنينه پئنجك شالوارين وار؟
اوشاق سؤزو واييشي بير آز نئجه دئيرلر قيجيقلانديرسا دا سسيني چيخارمادي. آخي آتاسينا اعتراضيني هميشه آناسينين واسيطةسيله يئتيريردي. بير ده كي، اونون اصل مقصدي اةجةرلي پئنجك ـ شالوار گئيمك ايدي. قوي اونو اوشاق حساب ائلةسينلر، يالنيز آناسينين اونا كيشي دئمةسي كيفايت ائديردي. ساتيجي «مالي نه اوسون؟» ـ دئيه سوروشدوقدا آتاسي دئدي:
ـ نه اولاجاق، ميل ـ ميلي فاسنيه.
ساتيجي رفدن بير دست پئنجك شالوار گتيريب بير باشي زورلا واييشين اگنينه گئيديردي. پنجةيين كيچيك اولدوغونو اؤزو ده بيلدي، آمما اوندان بؤيوك پئنجك واييشين ديزلريندن ده بير آز آشاغي دوشوردو. آتاسي پئنجةيين قوللاريني اوچ دفعه قاتلاييب ساتيجيا دئدي:
ـ نه عيبي وار، اوشاق بؤيويةجك دةةة. گلن ايل اگنينه دوز قالار.
لاكين واييش چيگينلريني اويناداراق بو بويدا پئنجةيي گئيمةيةجةييني بيلديردي. ساتيجي ايسه مشتريني ايتيرمةسين دئيه كيچيك نؤمرةلي پئنجةيي اوشاغين اگنينه گوجله كئچيريب اويان ـ بو يانيني دارتماقلا هر تؤرله اولورسا اونلارا سوخوشدوردو. واييش ائله اورداجا اةجةرلي پئنجك ـ شالواري گئييب كؤهنةسيني توربايا قويوب قولتوغونا ووردو…
كيشي ائوه لازيم اولان قنددن، چايدان، چيت چولةدن و بير آز دا بايرام آيين ـ اويونو و البته شام، هميشةجاوان بوداغي، بير ده كي، واييشا توپ تاراققا، چيرت ـ چيرت، اولدوزو فيشةنگ و… آليب خورجونون گؤزلرينه دولدوردو و نمين ماشينينا اوتوروب يولا دوشدولر.
اونلار گيلاندوودا ائنيب قالان يولو پيادا گئتمةلي ايديلر. كندين اؤزوندةجه سيسقا ياغيش باشلادي. هاوا ائله توتولموشدو كي، آچاجاغينا ذرةجة اوميد يئري قالميردي. يئكةليه چاتاندا تاماميله ايسلانميشديلار. واييشين آياقلاري «قالوش» آياققابي نين ايچينده فيرچيلدايير و هر آدديم آتاندا پالچيق قاريشيق سو آز قالا صيفةتينه چيرپيليردي. پئنجةيين اوزو ايله آسدارينين آراسينا قويولموش سيةزي پارالاري قوپوب قاباق جونگلرينه ييغيشميش و ايچي دولو توربا كيمي هر آدديم آتاندا ديزلرينه دةيير و واييش ايسه دند وورولموش جؤنگه كيمي يئريمةلي اولوردو. ايسلانميش فاسنيةنين رنگي اوشاغين بويون ـ بوغازيني تامام بوياميشدي…
ائولرينده ايكي ـ اوچ نفر آرواد وار ايدي. زولئيخا كؤرپةيه ايده كره اوددوروردو، گؤيچك بيبي اينةكلري ساغيردي، آناسي ايسه يئرين ايچينده اوزانميشدي.
واييشيني گؤرن آنانين سولغون دوداقلاري قاچدي و بوساغادا دايانان، پاپاغي بوغازينا كئچن و هله ده اوست ـ باشيندان سو سوزمةلةنن و كؤرپه قوزو نيگارانچيليغي كئچيرن واييشين آز قالا چيرپيناراق كؤكسونو دليب چيخاجاق اورةيي بير آز ساكيتلةشدي. بيردن پاپاغيني چيخاريب آتاراق آناسينا طرف شوتودو و سويوقدان گؤيرميش دوداقلاريني اونون سولغون ياناقلارينا سؤيكةدي. اورةييندن بير دويغو كئچدي. او دويغونون نه اولدوغونو دوز قيرخ ايل سونرا آيدينلاشديرا بيلدي: «آنا اولماياندان سونرا شهر نةدي، جنتين اوزو ده آداما ياپيشماز».
جمعي ايكي ساعات بوندان اول فاريغ اولموش آنا قالخيب اوتوردو. بالاسينين ايسلانميش پالتاريني اگنيندن چيخاريب دةييشدي. ياش پالتاري سيخيب كورسو آلتيندان تنديره آسلادي. اوشاغي اؤز يانيندا ياتيرديب يايليغي ايله اوز ـ گؤزونو سيليب قوروتدو. بيبيسي واييشا ياخينلاشيب كؤنلونو آلماق اوچون «بي بين قوربان، جيققيلي باجين اولوب ائي، اؤزو ده لاپ قاغاسينا اوخشايير»، دئدي. واييش سون درجه كسكين بير ايفاده ايله جاواب وئردي:
ـ نه باجي ايستي يم، نه قاغا!
زولئيخا خالا اؤزونه مخصوص ايفاده ايله و واييش باشا دوشمةسين دئيه بير باشي اشاره ايله دئدي:
ـ گؤزو گؤتورمور، كؤرپةنين خوروشون چةكير.
آمما بير واييش، بير ده آناسي بيليردي كي، او بو سوزو يالنيز آناسيني ايتيرمك احتماليندان دهشةتلي بير كابوسدان چوخ قورخدوغوندان دئيير….
ائرتةسي گون آنانين وضعيتي گؤزلةنيلن كيمي اولمادي. آرواد هله ده قان ايتيريردي. بيشيريلن قويماق و خشيلدن ده يئيه بيلميردي. آمما بوتون بونلارا باخماياراق هله زولئيخا خالا گلمزدن اول يئريندن دوردو، اوشاقلارينين چاي چؤرةييني حاضيرلادي و حتي واييش ناراحات اولماسين دئيه اونونلا بيرليكده، اورةيي آپارار ـ آپارماز بير ـ ايكي تيكه يئدي. سونرا كورسونون آلتيندا تنديره آسلانميش پئنجك ـ شالواري چيخاريب قيريشيغيني آچدي و سليقه ايله بوكوب بايرام گونو گئيمك اوچون بوقچايا قويدو…..
ايكي ـ اوچ گون عرضينده آروادلارين غيرعادي گليش گئديشي واييشي سون درجه نيگران ائتميشدي. آنانين گرگين وضعيتيني دوشونن زولئيخاخالا و سود گونوندن اعتبارا سحردن آخشاما كيمي واييش گيلده اولان گؤيچك بيبي كؤرپةنين چيلةيه دوشمك احتماليني اونوداراق اونو ائوه گلنلرين آياغينا آپارمير و حتي دوعاليقلي اولان آروادلارين بئله قيچينين آراسيندان كئچيرميرديلر. بئله مقاملاردا ائوه، دةيمةيه گلنلرين عادتا شن احوال ـ روحيه ايله زاهينين اون سويوندان ياخود قيرخيندان دانيشماغين يئريني اوميدسيز توركةداوا مذاكرةسي آلميشدي. بو بحثلر بعضا قيزغينلاشاراق فيكيرلرين چوخلوغو ايله گئنيشلةنير و پاييزدا سيغيرچينلارين اوچوشو كيمي معين بير نؤقطةيه دوغرو شوتويور، لاكين قونماق ايستةديكلري يئرين الوئريشلي اولماديغيني دويان سيغيرچين دستةسينين يئنيدن يوكسليب، آخير كي قونمالي اولدوقلاريني دوياراق لوپا ـ لوپا گؤيون ياخاسيندان قيريليب يئره دوشمةلري كيمي بحثين ده نتيجةسيز اولدوغونو دويان آروادلارين فيكيرلري هاچالانير و آيري ـ آيري فيكيرلر ايرةلي سورولوردو:
«آللاه درد وئريب، درمان دا وئريب»
«آروادين قئيدينه قالان اولماييب، دوعا ساتيبلار»
زولئيخاخالا اؤز وظيفةسيني دوزگون يئرينه يئتيرديگيني ايضاح ائدةرك دئدي:
«اول قاينار سو حاضيرلاديم، هاميني ائودن چيخارتديم. اوشاق اولدوقدان سونرا دا باخ او شيشله ائوين دؤورةسينه جيزيق چكديم، زاهينين باشي آلتينا دا لازيم اولان دميردن زاددان قويموشام !»
«باخ رحمتليك كالبا ننه بئله زاهيلارا آغچا چوغاني وئرةردي»
«يوخ، آرواد هوولاييب…»
بونلارين هاميسيني ائشيدن و اؤز وضعيتيني هاميدان ياخشي بيلن آنا ايسه آللاهدان بيرجه بو بايرامي مؤهلت وئرمةسيني ديلةييردي.
بايرامدان بير گون قاباق آنانين دةيمةيينه گلن آروادلار ائودن چيخاندا «آللاه شافاسين وئرسين»، دئسةلر ده اؤز دئديكلرينه ذرةجه اينانميرديلار. بير ـ بيرلري ايله دانيشاندا ايسه آنانين هم گلين دؤورونو ياشاديغيني، هم ده چولپالاريني نظره آلاراق «آللاه باغيشلاسين، آپارسين»، دئمةيه ده ديللري گلميردي.
بايرام گونو آرتيق واييش گيله گلنلرين هم سيستئمي هم ده يئريش قايدالاري دةييشميشدي. گلنلرين بير آياغي گلير، بير آياغي گلميردي. زاهينين اطرافيني تامام ياشلي قادينلار آلميشدي. هامي سوم توتوب اوتورموشدو.
آنا سون آنلاريني ياشايير، سون نفسلريني چكيردي. اوشاقلارين هاميسيني ائودن چيخارميشديلار و بايراملاشماق اوچون معين ائولره اكميشديلر. واييشين فيكريني تاماميله يايينديرماق اوچون حتي بوقچاني آچيب اجةرلي پئنجك ـ شالواريني گئيينديرمك ايستةديلر. لاكين ياغيش دةين پئنجك او قدر ييغيلميشدي كي، گؤيچك بيبي قولتوقلاريني سؤكسه ده اةينينه اولمادي.
قورو نفسدن باشقا هئچ بير حركت ائده بيلمةين آنانين گؤزلري غيرعادي اولاراق دولانير، اطرافي نه اوچونسه سوزوردو. ديلي اولسايدي، اوجادان باغيراراق «واييشيمي گتيرين دئيةجكدي»، لاكين دوداقلاري خفيفجه ترپنديسة ده هئچ بير سس ائشيديلمةدي. آخير كي، اونون بو غيرعاديليگينين معناسيني باشا دوشن اولدو. گؤيچك بيبي ائودن چيخاراق واييشي گتيردي. اونون اوزونو آنانين دوداقلارينا ياخينلاشديردي و بالاسيني سون دفعه اولاراق اؤپه بيلديگيندن ممنون اولدوغونو و عيني حالدا بئله حياتا نفرت ائتديگيني ايفاده ائدن سيرلي بير گولوشله دونياسيني دةييشدي….
بو فاجعةني واييشدان گيزلي ساخلاياراق اونو سرعتله ائودن چيخارديلار.
آخشام چاغي واييش ائوه قاييداندا گؤيچك بيبينين كايناتي ياخيب يانديران حزنله آغي چكديگيني ائشيتدي:
داغلارا باخ، داغلارا
شئه قوندو يارپاقلارا
آناني سوروشسالار
قاريشدي تورپاقلارا
واييش هؤنكورتو ايله آغلاماغا باشلادي و اؤز سسي اؤزونو اوياتدي.
طبيعتين شيلتاق قوينو خزردن قوپان مئه پارچالاري باغيروو داغلارينين اتةيي ايله ساوالانا دوغرو شوتويوردو. جوتدن آچيب دوبارايا اؤتوردويو اؤكوزلر قورو تورپاق اوزةرينده آغزي مئهه طرف ياتيب گؤوشةييرديلر. قيرغينين آماسيز هجومونا معروض قالان بير توراغاي قالين تيكان كولونا سيغينيردي. چةييرتكةني نيشان آلان كرتينجك يئره دوغرو شوتويوردو. ائله بو آنداجا اوغلو قارا آناسينين اؤيرتديگي قايدايلا، «بيري مين اولسون، يورولماياسان آتا، موشدولوغومو وئر، جيققيلي باجيم اولوب» دئدي….

























دومان

[ خانه | آرشيو | پست الكترونيك ]